Höfundaréttur samkvæmt lögum nr. 73/1972
Samkvæmt 1. mgr. 1. gr. höfundalaga nr. 73/1972 með síðari breytingum á höfundur að bókmenntaverki eða listaverki eignarrétt á því. Til bókmennta og lista teljast samið mál í ræðu og riti, leiksviðsverk, tónsmíðar, myndlist, byggingarlist, kvikmyndir, ljósmyndalist, nytjalist og aðrar samsvarandi listgreinar, á hvern hátt og í hverju formi sem verkið birtist. Nýtur höfundur einkaréttar til að gera eintök af verki sínu, sbr. 3. gr. l. nr. 73/1972, með þröngri undantekningu í 1. mgr. 11. gr. laganna um gerð eintaka til einkanota eingöngu. Til að öðlast heimild til ljósritunar eða annarrar hliðstæðrar eftirgerðar verka umfram það sem kveðið er á um í 1. mgr. 11. gr., er nauðsynlegt að fá samþykki viðkomandi höfunda og útgefenda verka. Án slíks samþykkis er ljósritun ólögleg og er refsiverð skv. VII kafla höfundalaga og hefur í för með sér skaðabótaskyldu skv. 56. gr. sömu laga.
Það getur reynst erfitt og tímafrekt að hafa upp á einstökum höfundum og útgefendum og oft á tíðum er það ómögulegt. Til að koma til móts við þörf atvinnulífs og almennings til ljósritunar umfram heimild til ljósritunar til einkanota er kveðið á um það í 15. gr. a) höfundalaga að hægt sé að afla sér heimildar til ljósritunar eða hliðstæðrar eftirgerðar verka til afnota í starfsemi sinni með samningum við samtök höfundaréttarfélaga sem annast hagsmunagæslu fyrir verulegan hluta íslenskra höfunda á því sviði og hlotið til þess lögformlega viðurkenningu menntamálaráðuneytisins. Þessi heimild tekur einnig til verka höfunda sem ekki eru félagar í viðkomandi samtökum. Hver einstakur höfundur getur þó lagt skriflegt bann við fjölföldun verka sinna samkvæmt þessari grein laganna.
Umboð Fjölís samkvæmt höfundalögum
Fjölís annast hagsmunagæslu fyrir meirihluta íslenskra höfunda og útgefenda á sviði fjölföldunar skv. 15. gr. a) höfundalaga og hefur hlotið til þess lögformlega viðurkenningu menntamálaráðuneytisins. Sú viðurkenning felur það í sér, m.a. skv. 3. mgr. 15. gr. a) höfundalaga, að Fjölís er ábyrgt fyrir öllum þeim kröfum sem fram kunna að koma frá handhöfum höfundaréttar sem ekki eru félagar í samtökunum og réttmætt tilkall eiga til greiðslu fyrir fjölföldun og verða slíkar kröfur aðeins gerðar á hendur samtökunum.
Gegnum þátttöku í IFRRO (International Federation of Reproductions Rights Organizations) hefur Fjölís aflað sér umboðs fyrir erlenda rétthafa frá eftirtöldum löndum og annast samsvarandi hagsmunagæslu fyrir þá og fyrir íslenska rétthafa: Noregur, Kanada (ensku- og frönskumælandi), Finnland, Sviss, Þýskaland, Svíþjóð, Spánn, Ástralía, Frakkland, Danmörk, Stóra-Bretland, Nýja Sjáland, Írland, Færeyjar, Grikkland, Slóvakía, Zimbabwe, Tékkland, Belgía, Hong Kong, Argentína.